Unha primeira avanzada do exército romano conformada polos nenos e nenas da escola infantil A Fraga Encantada iniciou, esta mañá, a operación para conquistar o castro de Cambre. En total, foron preto de 40 os soldados de entre 2 e 8 anos que realizaron a primeira inspección sobre o terreo. Os pequenos foron recibidos polo concelleiro da Axencia de Desenvolvemento Socioeconómico, Turismo e Patrimonio, Ramón Boga.
Os pequenos acudiron ao lugar dispostos a iniciar a batalla. Así, un ano máis, levaron túnicas, cascos, espadas e escudos confeccionados por eles mesmos.
Todo antes do arranque da VII Galaicoi, que terá lugar mañá, venres 19 de xullo, a partir das 18.00 horas. Prevese que o inicio das hostilidades entre os castrexos e os romanos comece ás 19.00 horas, tras a finalización da Asemblea de Clans.
