O escritor Wenceslao Fernández Flórez inspirouse nas Fragas de Cecebre para escribir O bosque animado, unha das súas obras máis famosas. Iso foi no 1943. Practicamente oito décadas despois, o artista ourensán, Mon Devane, utilizou ao Fendetestas, un personaxe desta mesma obra, como protagonista dun mural. A creación, localizada no lugar dos Campóns (Sigrás, Cambre), podería converterse na mellor do mundo no 2022 segundo a plataforma global Street Art Cities. Precisamente, co fin de impulsar esta candidatura, o Concello deu a coñecer, esta mañá, a súa nova ferramenta de realidade aumentada (AR), dispoñible xa en Instagram. Con ela, calquera usuario ou usuaria pode facer que o Fendetestas, caracterizado por Xosé Antonio Touriñán, cobre vida, converténdoo, de forma literal, nun personaxe animado.
Desta forma, os usuarios e usuarias poderán utilizar un código QR que os redirixirá, directamente, a Instagram (e, en concreto, ao filtro Fendetestas). Unha vez aberta esta sección, deberán enfocar a cámara do teléfono ao mural ou mesmo a unha fotografía do mesmo. Nese momento, coma se de maxia tratásese, Xosé Antonio Touriñán comezará a moverse.
O alcalde, Óscar García Patiño, o concelleiro de Deportes e Xuventude, Daniel Mallo, e os deseñadores, animadores e programadores desta tecnoloxía AR, David Saborido e Javier Portomeñe, foron os encargados de explicar como xurdiu esta idea e o funcionamento da ferramenta.
“O mural de Mon Devane foi o mellor do mes de xullo, polo que sabíamos que este ía ser un dos seleccionados para optar a ser tamén o mellor do mundo do 2022. Tendo isto claro, queriamos pór en marcha unha campaña que nos servise para promocionalo e así obter un maior apoio por parte da cidadanía”, explicou o rexedor durante a súa intervención. “Agora temos dúas obras seleccionadas e que poderían acadar este recoñecemento, polo que se esta ferramenta xera interese entre a veciñanza, estudaremos aplicar a tecnoloxía noutros murais do termo municipal”.
Pola súa banda, Saborido e Portomeñe explicaron como chegaron ao resultado final: “tivemos que sacar unha gran cantidade de fotografías do mural desde varios ángulos, a diferentes horas do día e utilizando distintos tipos de configuración da cámara. Despois, seleccionamos aquelas que tiñan unha maior semellanza co mural para tentar ser o máis respectuosos posibles co traballo que fixera Mon Devane”. Os dous animadores utilizaron, en primeiro lugar, un programa de edición fotográfica para facer a edición das instantáneas por capas. A continuación, fixeron a animación realizando tamén as deformacións por puntos. Desta forma, obtiveron unha animación simplificada para Instagram e que se proxecta tras escanear un código QR.
As redes sociais municipais e a páxina web recollerán desde hoxe, luns 23 de xaneiro, toda a información e o código QR para que os usuarios e usuarias poidan probar este novo filtro, dispoñible en Instagram. Tal e como se indicou na presentación desta ferramenta, a previsión é que a xente interactúe co mural utilizando esta ferramenta, moi intuitiva.
Ver esta publicación en Instagram