O fotógrafo David Mateo expoñerá o seu traballo na Casa da Cultura Vila Concepción. Baixo o título Wheels and Photos, a mostra estará conformada por 30 instantáneas nas que se reflectirá o rexurdir da moto clásica e a paixón que o motociclismo esperta entre miles de persoas. A exposición estará dispoñible desde este venres, 12 de abril, ata o día 30.

O autor realizou un extenso labor de documentación, abarcando desde carreiras en Galicia ata reunións café racer en Francia e tamén concentracións moteiras. Todas as fotografías foron captadas en Biarritz (Francia), na Coruña e en Pontevedra.

Na exposición, David Mateo valeuse do branco e negro, utilizando unha técnica de relevado similar á que se empregaba nas películas con moito gran. Todo este traballo de fotografía e revelado resultou nunha mostra composta por retratos e fotografías coas que o público poderá coñecer o ambiente moteiro, situacións do día a día neste mundo e mesmo outras propias de hai anos como, por exemplo, a arrancada con patada.