O Concello de Cambre acaba de sacar a licitación o proxecto de mellora da pista polideportiva municipal do Temple. As obras, valoradas en 60.000 euros, estarán financiadas a cargo do Plan Único POS+ 2022 da Deputación da Coruña, e inclúen actuacións na pavimentación, pintado, drenaxe e peche das instalacións.

En primeiro lugar, procederase á repavimentación da pista, que na actualidade atópase sensiblemente deteriorada, para despois continuar co seu pintado, co que se marcarán unha pista de fútbol-sala e dúas pistas de minibasket.

Posteriormente, ampliarase a drenaxe coa execución de varias xuntas, e procederase á preinstalación do cableado para preparar unha futura mellora na iluminación da zona. Por último, traballarase sobre o peche, restaurando o actual valado e renovándoo nos fondos de ambas as porterías.

A alcaldesa de Cambre, María Pan, quixo destacar “o apoio de Alternativa dos Veciños, que co seu voto a favor a estas licitacións están poñendo por diante unha vez máis o interese xeral dos veciños e veciñas de Cambre”. Ademais, a rexedora insistiu en pedir “a todos os partidos da Corporación a remar xuntos polo ben de Cambre”.