O Concello realizará un seguimento das obras que unha empresa de telecomunicacións está a levar a cabo no lugar de Seoane (Anceis) para instalar unha antena de telefonía. Desde o equipo de goberno explican que “a compañía realizou unha comunicación previa para a realización dos traballos tal e como indica a normativa nestes supostos. Así mesmo, pedíuselle ao inspector de obras que fixese un estrito seguimento do avance destas tarefas para comprobar que se axustan á normativa”. Como indican desde o goberno local, “se todo está en regra, desde o Concello non podemos limitar a colocación desta antena”. Con todo, como avanzan, valorarase e analizarase a viabilidade de adoptar un cambio no PXOM de Cambre, aínda en tramitación, para limitar a colocación deste tipo de elementos no futuro.

Desde o goberno local comprenden “as posibles molestias e inquedanzas que este tipo de elementos provocan entre a cidadanía, pero non por iso podemos limitar os dereitos dunha empresa privada para instalar estas antenas”. Desde o equipo de goberno recalcan que se está mantendo un contacto constante coa asociación de veciños, á que xa se informou de que se “levará a cabo un seguimento exhaustivo do desenvolvemento do proxecto para garantir que estas cumpren coas normativas. A maiores, atenderanse, como non podía ser doutro xeito, todos os escritos que presenten os particulares sobre esta instalación por se se deran razóns para cuestionar a comunicación previa”.

Cambio PXOM

Como solución a medio e longo prazo, o goberno local valorará promover unha modificación no Plan Xeral de Ordenación Municipal. A idea será limitar as zonas nas que se poden dispoñer este tipo de elementos, unha medida coa que se busca minimizar as posibles queixas por parte dos veciños e veciñas.

No ano 2019, o goberno local xa impulsara unha modificación das normas subsidiarias similar para restrinxir a presenza de gasolineiras, discotecas e outro tipo de negocios nos núcleos urbanos ou rurais de uso principal residencial. “A idea sería promover un axuste similar, limitando, neste caso, a instalación deste tipo de antenas”.