O inicio do curso chega co lanzamento dos programas de actividades socioculturais e educativas

21 Set 2022

Tamén che pode interesar

O inicio do curso escolar 2022/2023 trae consigo o lanzamento dunha nova convocatoria dos programas de actividades socioculturais e educativas. Trátase dunha oferta “completa” coa que o goberno local busca brindar “propostas de lecer culturais e deportivas aos veciños e veciñas de todas as idades”.

Por unha banda, a oferta de actividades socioculturais de proximidade achegará ás zonas urbanas e ás parroquias do municipio as seguintes iniciativas:

  • Reforzo de memoria: dispoñible na Barcala, Anceis, Bribes, Cambre, Cecebre, Meixigo, O Temple, Santa María de Vigo e Sigrás.
  • Manualidades: na Barcala, Anceis e O Temple.
  • Pintura: no Temple (dous grupos)
  • Sevillanas: no Temple
  • Fotografía: en Brexo-Lema
  • Informática básica: na Barcala e O Temple
  • Manexo de móbil e tablet: Brexo-Lema, Sigrás, Pravio, Meixigo, Cecebre e Santa María de Vigo.
  • Meditación: Bribes
  • Costura e confección: na Barcala

As actividades comezarán o próximo 3 de outubro e terminarán o 31 de maio de 2023, fóra da de manexo de móbil e tablet, que conta cunha duración específica. As persoas interesadas poderán anotarse ata o 27 de setembro cumprimentando o formulario de inscrición e entregándoo nos rexistros municipais ou a través da sede electrónica.

Actividades educativas

Como todos os anos académicos, o Concello organiza, así mesmo, o programa de actividades educativas para os nenos e nenas. A proposta para 2022/2023 inclúe as seguintes iniciativas:

  • Xadrez (iniciación): para alumnado de educación Primaria, ESO e Bacharelato.
  • Xogos predeportivos: nenos/as de 6º educación Infantil e 1º e 2º de educación Primaria.
  • Escola de minivoleibol: alumnado de 3º a 6º de educación Primaria.
  • Escola municipal de ciclismo: alumnado desde 2º de educación Primaria.
  • Taller de inglés: 5º e 6º de educación Infantil e de 1º a 6º de educación Primaria.
  • Actividade informática (robótica e programación): 6º de educación Infantil e para toda Primaria.

O prazo de inscrición estará aberto ata o 26 de setembro. As persoas interesadas poderán tramitar a súa solicitude enchendo o formulario dispoñible na web municipal e entregando a documentación necesaria nos rexistros do Concello ou na sede electrónica.

Escola de Familias

A maiores, o curso académico contará tamén coa Escola de Familias, coa que se buscará dar apoio educativo e psicolóxico aos pais, nais, titores ou outros familiares do alumnado. A meta non é outra que colaborar cos familiares na educación dos seus fillos/as resolvendo, así mesmo, calquera dúbida que poidan ter tanto os adultos como os propios nenos e nenas. Esta iniciativa incluirá módulos sobre as seguintes temáticas: absentismo e fracaso escolar (17 de outubro), mediación de conflitos no ámbito escolar (7 de novembro), uso responsable de redes sociais (28 de novembro) e iniciación á educación afectivo-sexual e coñecemento da diversidade (12 de decembro).