O inicio do curso escolar 2023/2024 trae consigo o lanzamento dunha nova convocatoria do programa de actividades socioculturais de proximidade. O concelleiro de Cultura, David Saborido, sinala que o obxectivo destas propostas é “dinamizar as parroquias do municipio, ofrecendo unha programación cultural e de lecer para veciños e veciñas de todas as idades”.
As actividades comezarán o próximo 2 de outubro e terminarán o 31 de maio de 2024, fóra da de manexo de móbil e tablet, que conta cunha duración específica. As persoas interesadas poderán anotarse desde mañá, mércores 20 de setembro, ata o día 27. Para iso, deberán cumprimentar o formulario de inscrición dispoñible na páxina web municipal e entregalo nos rexistros municipais ou a través da sede electrónica.
Como novidade con respecto á convocatoria anterior, o local social de Cela incorpórase como nova localización para algunhas das actividades. Desta forma, as sesións formativas realizaranse tanto nas zonas urbanas como nas parroquias. A oferta do curso 2023/2024 inclúe:
- Reforzo de memoria: dispoñible na Barcala, Anceis, Brexo Lema, Bribes, Cambre, Cela, Meixigo e O Temple (neste último caso, haberá dous grupos)
- Manualidades: na Barcala, Anceis e O Temple
- Pintura: en O Temple (dous grupos)
- Sevillanas: no Temple
- Fotografía: na urbanización A Barcala
- Informática básica: na Barcala e O Temple
- Manexo de móbil e tablet: Brexo Lema, Sigrás, Pravio, Meixigo, Cecebre e Cela
- Meditación: Santa María de Vigo
- Patchwork: urbanización A Barcala
- Costura e confección: na Barcala
- Cestería: en Cambre
