A última actividade que se realizou dentro do programa consistiu nunha excursión á lagoa de Cospeito.

O programa ‘Vente de marcha’ da Oficina Municipal de Información Xuvenil (OMIX) ofrecerá unha nova saída. Nesta ocasión, o destino da excursión será a lagoa de Vixán, no parque natural de Corrubedo. A previsión é que a proposta se leve a cabo o 15 de outubro e que o prazo de inscrición se abra a finais do mes de setembro. A última das saídas do ‘Vente de marcha’ tivo lugar a pasada fin de semana e, na mesma, participaron unha trintena de persoas que coñeceron a lagoa de Cospeito.

A actividade incluíu un roteiro de 15 km na que as persoas participantes discorreron polos seguintes puntos en torno ao humidal de Terra Chá: San Martiño de Lamas (Os Currás), Lagoas de Lousado, Lagoa de Carballosa, Bodenlle, A Torre, Felín, Feira do Monte, A Lama de Anidos, e Lagoa de Valverde. Ademais do propio percorrido, a OMIX organizou unha actividade complementaria que, neste caso, consistiu en piragüismo e tiro con arco.

O tópico central de todas as saídas da convocatoria serán os lagos, lagoas e termas de toda Galicia. O concelleiro de Deportes e Xuventude, Daniel Mallo, sinala que o obxectivo deste programa, que conta cunha gran aceptación veciñal, “é promover un estilo de vida saudable entre a cidadanía, dando a coñecer, ademais, lugares de interese de toda a xeografía galega”. Neste sentido, as saídas organízanse sempre nas fins de semana co fin de estimular a participación entre os veciños e veciñas de todas as idades.