Un dos pratos fortes do Rock in Cambre será, sen dúbida, a actuación dos grupos locais, galegos, nacionais e internacionais. Con todo, o programa do festival ofrecerá numerosas actividades pensadas, especialmente, para o público infantil. O concelleiro de Cultura, David Saborido, sinala que estas iniciativas buscan “seguir cultivando a paixón por este xénero musical entre as novas xeracións”. A programación prolongarase entre o 3 e o 10 de agosto. A primeira proposta consistirá no taller ‘Vive o rock… a mogollón’, de iniciación á linguaxe musical. Será o xoves, 3 de agosto, de 18.30 a 19.30 horas no centro sociocultural do Graxal. Ao día seguinte, venres 4 de agosto, terá lugar un taller de batería. Neste caso, haberá dúas quendas: a primeira, de 17.00 a 18.00 horas, e a segunda, de 18.30 a 19.30 horas. Ambas as sesións celebraranse no local de ensaio da Barcala. O vindeiro martes, 8 de agosto, será a quenda do taller ‘Queres ser rockeiro? Crea o teu propio instrumento’ destinado a pequenos e pequenas de entre 6 e 12 anos. Será no centro sociocultural da Barcala de 18.30 a 19.30 horas. O mércores, 9 de agosto, haberá un taller de customización de camisetas na aula de costura da Barcala (19.00 a 20.00 horas). A oferta terminará o xoves, día 10, co taller de danza ‘Rock miúdo’.  Será no local social de Samosteiro e está pensado para nenos e nenas de 4 a 12 anos. As persoas interesadas terán que anotarse previamente a través do teléfono 981 61 31 93 ou no WhatsApp 649 891 212.