O alumnado de 5º de primaria do CEIP Portofaro celebrou, esta semana, unha simulación de eleccións con todo luxo de detalles. Foron nove as formacións políticas que concorreron aos comicios e que expuxeron, fronte á alcaldesa de Cambre, María Pan, e ao resto de compañeiros de clase, os seus programas electorais. Tras pronunciar os discursos de peche de campaña, levouse a cabo a votación, na que o Partido Popular Estudantil de Portofaro (PPEP) resultou gañador con 11 votos.

Durante o desenvolvemento da actividade, a rexedora explicoulles como eran unhas eleccións municipais: sistema, reconto e tipoloxía dos votos. Así mesmo, Pan Lesta aproveitou a ocasión para indicarlles tamén como funcionaban os plenos municipais. A primeira edil felicitou a todos os mozos e mozas polo traballo realizado, en especial ao partido gañador destes comicios, representado pola alumna Ana Sofía Machado Abreu.

A formación PPEP conseguiu un maior apoio tras expor un programa no que adquiría os seguintes compromisos: a realización, unha vez ao mes, dunha actividade ao aire libre para trasladar a aula ao exterior; a organización de certames de pronuncia, gramática, oratoria e matemáticas para repasar os contidos impartidos na aula e, ademais, aprender outros idiomas e a celebración mensual dun día saudable, unha xornada para inculcar hábitos de alimentación saudable entre o alumnado.

Outras propostas

O resto das formacións expuxeron tamén as súas propostas para mellorar o centro educativo: o cambio na comida do comedor, a organización de máis actividades de lecer como yincanas, o reforzo da seguridade na entrada do colexio ou o arranxo e suma de máis servizos no CEIP foron algunhas das medidas máis recorrentes.