Os castrexos e os romanos volverán á batalla. O enfrontamento entre os bandos será, un ano máis, a temática central da Galaicoi de Cambre, que chega á súa sexta edición. O castro acolleu, esta mañá, a presentación oficial da romaría, que correu a cargo do edil de Turismo e Patrimonio, Ramón Boga, e da concelleira de Desenvolvemento Asociativo, María Carmen Pan Matos. A maiores, acudiron representantes dalgunhas das asociacións participantes: Asociación Cultural Santa María do Temple, Asociación de Amas de Casa de Bribes, Asociación de Amas de Casa de Cambre, Aires de Sigrás e de Gallaecia Viva.
A Romaría Castrexo-Romana Galaicoi comezará este venres, 14 de xullo, e prolongarase ata o domingo, día 16. En canto ao horario, o venres será de 17.00 a 1.00 horas, o sábado de 11.00 a 14.00 horas e de 17.00 a 1.00 horas e o domingo, de 11.00 a 14.00 horas e de 17.00 a 20.00 horas.
O programa arrincará o venres, ás 17.00 horas, coa asemblea de clans. Este encontro dará paso á declaración da guerra e ao comezo das hostilidades entre os dous bandos (17.30 horas). Desde ese momento e ata o final, os bandos enfrontados encerellaranse en múltiples batallas ata que o domingo, 16 de xullo, cando asinarán o tratado de paz. O programa da romaría incluirá mercado con preto de medio centenar de postos, talleres, guerras e escaramuzas, desfiles, pasacalles e actividades de animación musical, concerto dos Festicultores Troupe (venres, 14, ás 23.00 horas) representacións teatrais etc.
Actividades infantís
O Concello organizará, ademais, numerosas propostas para os nenos e nenas. O programa infantil contará con estacións con xogos tradicionais e reciclaxes e tamén campionatos castrexos con diferentes probas físicas.
As propostas infantís comezarán o propio venres pola tarde e sucederanse ao longo de toda a fin de semana. En canto aos horarios, as estacións de xogo e atraccións estarán dispoñibles o venres ata as 22.00 horas e o sábado e o domingo de 11.00 a 14.00 e de 17.00 a 22.00 horas. Os campionatos castrexos arrincarán tamén o propio venres, pola tarde, e continuarán o sábado e o domingo, de 12.00 a 15.00 horas e de 18.00 a 22.00 horas (realizándose cada hora, aproximadamente).
Patrimonio e historia
Durante a súa intervención, o responsable de Turismo e Patrimonio sinalou tres dos obxectivos centrais da cita: “a posta en valor da historia de Cambre, a recuperación e aproveitamento do castro e o impulso que se consegue dar ao tecido económico do municipio”. Boga iniciou no “gran arraigo” que a cita ten entre os veciños e veciñas, algo que se reflicte nas cifras de participación. A concelleira de Desenvolvemento Asociativo destacou, ademais, que a Galaicoi convértese “nun punto de encontro para o tecido asociativo. Entidades culturais, deportivas e veciñais xúntanse no castro para xantar, tocar música, facer actividades e, en xeral, para compartir”.
Asociacións
Máis aló das propias actividades, un dos principais atractivos da romaría é a convivencia no castro, onde se reúnen as asociacións do municipio. O xacemento convértese, durante tres días, nun auténtico poboado castrexo cunhas 30 cabanas. O Concello recibiu preto de medio centenar de solicitudes para a ocupación destas construcións. Da cifra, 23 correspóndense coas das asociacións veciñais, culturais e deportivas. Con todo, a romaría no castro estará aberta a todas as persoas que desexen sumarse.