Reunir a uns 300 músicos da Escola de Música Sementeira e dos colexios de Cambre pode parecer un reto. Con todo, isto será, precisamente, o que farán desde Sementeira o próximo 20 de maio. Ese día, a pista polideportiva O Souto (Sigrás) acollerá Os Soños na Gaiola, un evento no que se darán cita alumnos e alumnas de entre 3 e 12 anos dos colexios Wenceslao Fernández Flórez, Torrente Ballester, Portofaro, Graxal e da propia Escola de Música Sementeira. A actividade está organizada por Sementeira en colaboración cos centros de ensino e o Concello. O proxecto materializarase esa xornada, pero a preparación para que todo salga segundo o previsto supuxo un “traballo de meses”, tal e como recoñece o director da Banda de Música Sementeira, Jesús Sánchez Montero: “sen a implicación e o traballo dos mestres e da dirección da Escola Sementeira, do Concello e do equipo docente dos centros de ensinanza este proxecto non sería posible”. Na cita participarán as bandas xuvenil e titular de Sementeira. A maiores, os estudantes tomarán parte no coro e tocando instrumentos orff (fundamentalmente, percusión) con poemas de Manuel María e musicados polo compositor, Antón Alcalde. Sánchez Montero explica que o obxectivo da actividade “era contar con representación de todo o municipio e, por iso, contactamos cos colexios, que amosaron un enorme interese desde o primeiro momento”. Este venres, 12 de maio, está prevista a realización dun ensaio con todos os alumnos e alumnas que actuarán en Os Soños na Gaiola. Antes desta data, o director foi recibindo vídeos das prácticas dos pequenos músicos e músicas, “que teñen un nivel moi alto”. O director anima a todos os veciños e veciñas a gozar do evento “non que os músicos e músicas serán os verdadeiros protagonistas, demostrando o seu enorme talento musical e a súa capacidade”.