Esta primeira fase estará aberta desde hoxe, luns 26 de setembro, ata o 18 de outubro.

Unha vez superadas todas as fases, as iniciativas que resulten gañadoras incorporaríanse aos orzamentos de 2023 do Concello.

O Concello aspira a involucrar aos veciños e veciñas na confección dos orzamentos de 2023. Farao co lanzamento do VII Decidámolo Xuntos, un proceso participativo co que a cidadanía poderá realizar as súas propostas de investimento. Esta primeira fase estará aberta desde hoxe, luns 26 de setembro, ata o 18 de outubro. Desde o equipo de goberno animan aos veciños e veciñas a sumarse a esta iniciativa, “que xa está asentada como unha das principais vías de participación cidadá en Cambre”.

Os veciños e veciñas dispoñen de varias vías para participar no proceso. Poderán facelo a través da web www.decidamoloxuntos.cambre.es ou cumprimentando o formulario correspondente e entregándoo por algunha das seguintes vías: depositándoo nos buzóns localizadas nos locais sociais das parroquias, en calquera dos tres rexistros municipais ou enviándoo ao correo decidamoloxuntos@cambre.org.

Tal e como recolle o manual deste programa, as propostas veciñais deben ser de investimento e de competencia municipal. Unha vez pechada esta primeira fase, os servizos técnicos municipais analizarán todas as achegas. En caso de obter a puntuación requirida, estas pasarían á fase de votación, na que os veciños e veciñas volverán ter un papel protagonista. Neste caso, poderán puntuar tres das súas iniciativas favoritas con entre 1 e 3 puntos. As que resulten gañadoras incluiranse no documento económico do Concello para o 2023. Unha vez incorporadas nos orzamentos, e tendo en conta os prazos de redacción, a solicitude de permisos ás administracións correspondentes e os períodos de contratación, o Concello poderá executar os proxectos nun prazo de dous anos naturais tal e como recolle o manual.

Última edición

A edición de 2021 pechouse alcanzando as mellores cifras da súa historia. Desta forma, o Decidámolo Xuntos creceu tanto en número de propostas recibidas como en cantidade de propoñentes e cifras de participación. Por unha banda, solicitáronse 644 iniciativas veciñais, un 53% que no exercicio anterior. Esta tendencia á alza rexistrouse tamén na cantidade de persoas participantes: pasouse de 178 participantes en 2020 aos 322 de 2021, o que supuxo un aumento do 180%.