A sétima edición do Decidámolo Xuntos avanza co inicio dunha nova fase, a de votación. Os veciños e veciñas volverán ter un papel protagonista nesta etapa do proceso participativo. Tanto é así, que desde mañá, sábado 29 de outubro, e ata o próximo 7 de novembro, poderán recorrer á páxina web decidamoloxuntos.cambre.es para elixir as súas tres propostas favoritas de entre as 11 finalistas. A listaxe foi confeccionada polos técnicos municipais, que estudaron todas as proposicións realizadas durante a fase de presentación. Na relación final aparecen reflectidas aquelas ideas que obtiveron unha maior puntuación tendo en conta os criterios fixados no manual de valoración.

O alcalde, Óscar García Patiño, subliña o compromiso do goberno local por seguir apostando por este tipo de medidas, “que nos permiten coñecer as demandas e necesidades da veciñanza. A participación e a escoita activa continuarán sendo unha das nosas liñas de traballo”.

As 11 propostas que pasan á fase de votación son as seguintes:

1. Investimento para plantar árbores en Curros Enríquez: instalación de máis arbolado e de novos xardíns con céspede e flores para conseguir máis zonas de sombra.
2. Acondicionamento no local social de Brexo-Lema: realización de traballos para que o espazo poida servir de almacén para as asociacións con domicilio social neste local.
3. Parque no Monte dos Veciños: converter o Monte dos Veciños nunha zona de recreo para o municipio, equipándoa con mobiliario acorde á contorna.
4. Zona verde no castro: solicítase que o castro de Cambre se manteña durante todo o ano como zona de recreo, arranxando o acceso mediante a construción dunha rampla de madeira que permita o acceso peonil e manténdoa como unha zona verde coidada.
5. Humanización da contorna da igrexa de Cela: actuación para humanizar a contorna, creando zonas axardinadas, reparando o firme e substituíndo o peche, e eliminando o poste localizado na zona central.
6. Habilitar o baixo cuberta do local social de Meixigo: acondicionar a zona de baixo cuberta da Casa do Pobo, facer a instalación eléctrica e deixalo apto para o seu uso como almacén.
7. Impulsar unha zona de recreo e esparexemento no Souto.
8. Elevación de pasos de peóns na rúa Otero Pedraio.
9. Instalación de sumidoiros no camiño 333 de Anceis.
10. Renovación das xanelas e colocación de persianas no local social de Bribes.
11. Instalación de mesas de tenis de aceiro na rúa peonil situada detrás do centro de saúde e da escola infantil do Temple.

Para emitir os seus votos, os cambreses e cambresas deberán escoller as súas 3 propostas favoritas, outorgando as puntuacións de 3, 2 e 1 punto en función da prioridade que lle concedan a cada proposta. O período de votación estará aberto ata o próximo 7 de novembro. Para efectuar o seu voto, os veciños dispoñerán da web https://decidamoloxuntos.cambre.es/.