Os veciños e veciñas terán un papel decisivo na IV Gala do Deporte. Tanto é así, que a través dos seus votos, poderán outorgar ata 17 dos 21 premios do evento. Trátase dunha novidade que o goberno local incorpora para darlle á cidadanía unha maior participación e protagonismo na cita. O alcalde, Óscar García Patiño, e o concelleiro de Cultura, Deportes e Xuventude, Daniel Mallo, presentaron, esta mañá, a cuarta edición do evento, que terá lugar o 25 de novembro na Facultade de Ciencias do Deporte e a Educación Física (INEF) de Oleiros.

Durante a súa intervención, o rexedor explicou que o evento buscará poñer en valor o traballo dos clubs, equipos e entidades de Cambre, “que é crucial para continuar coa nosa aposta pola promoción do deporte”. Mallo incidiu en que a gala permitirá agradecer “ás entidades o esforzo que realizaron na pandemia, na que o seu traballo foi importante para devolver á poboación os hábitos de vida saudables e o contacto social”.

Desde o departamento de Deportes contactouse cos preto de 40 clubs e entidades que realizan a súa actividade no municipio para que propuxesen os seus candidatos nalgunha das seguintes categorías:

· Mellor deportista cambresa, categoría base (nadas entre os anos 2006-2014) deporte individual.

· Mellor deportista cambresa, categoría base (nadas entre os anos 2006-2014) deporte colectivo.

· Mellor deportista cambrés, categoría base (nacidos entre os anos 2006-2014) deporte individual.

· Mellor deportista cambrés, categoría basee (nados entre os anos 2006-2014) deporte colectivo.

· Mellor deportista cambresa, categoría absoluta (nadas en 2005 ou anteriores) deporte individual.

· Mellor deportista cambresa, categoría absoluta (nadas en 2005 ou anteriores) deporte colectivo.

· Mellor deportista cambrés, categoría absoluta (nadas en 2005 ou anteriores) deporte individual.

· Mellor deportista cambrés, categoría absoluta (nadas en 2005 ou anteriores) deporte colectivo.

· Mellor equipo cambrés feminino.

· Mellor equipo cambrés masculino.

· Deportista cambresa máis querida.

· Deportista cambrés máis querido.

· Mellor promesa cambresa.

· Mellor promesa cambrés.

· Mellor entidade deportiva.

· Mellor adestrador/a.

· Mellor deportista con diversidade funcional.

En cada categoría recolleranse as propostas formuladas polos clubs. En canto á votación, esta estará dispoñible a través da páxina web municipal (www.cambre.es/iv-gala-do-deporte) ata o 18 de novembro. As persoas poderán votar por un dos nomeados de cada modalidade.

A maiores destes recoñecementos, o Concello entregará os seguintes galardóns: mellor deportista feminina, mellor deportista masculino, tres premios para a distinción “Deporte a toda a vida Bernardo Bish” e á mellor campaña socio-deportiva. Neste caso, haberá un xurado encargado de conceder estes recoñecementos.