Setenta familias de Cambre poderán acceder ao programa de conciliación que o Concello organiza polas festas de Entroido

20 Xan 2023

Tamén che pode interesar

Ata 70 familias poderán acceder ao novo programa de conciliación que o Concello organiza polas festas de Entroido. A iniciativa levarase a cabo tanto o 20 como o 22 de febreiro no CEIP Wenceslao Fernández Flórez e estará dirixida a alumnos e alumnas das seguintes etapas formativas: 4º, 5º e 6º de Infantil, todo Primaria e 1º da ESO. O concelleiro de Educación e Sanidade, Miguel Ángel Gutiérrez, sinala o compromiso do goberno local por “seguir ofrecendo actividades que promovan a conciliación da vida laboral e familiar nos períodos e datas nos que os nenos e nenas non teñan clases”. Como apunta o edil, este obxectivo que se consegue con “os campamentos de verán, con Xogando no Nadal ou con esta nova edición de talleres e xogos no Entroido”. O programa ofrecerá un máximo de 70 prazas para os veciños e veciñas. A maiores, poderíanse poñer en marcha outros servizos complementarios (almorzo, actividades, comida e transporte) a condición de que haxa o número mínimo de solicitudes para cada prestación. As persoas interesadas poderán formalizar a súa solicitude desde o luns, día 23 ata o día 30 de xaneiro (ambos os incluídos). A documentación poderá presentarse por vía telemática a través da sede electrónica ou en calquera dos rexistros de entrada (solicitando, para iso, cita previa).