Transmitir as lendas e tradicións sobre San Xoán aos máis novos e garantir que estas pasen de xeración en xeración. Esa é a idea central da actividade que a Oficina Municipal de Información Xuvenil (OMIX) de Cambre ten preparada para esta semana. A proposta terá lugar en Casa das Palmeiras ao longo da tarde do propio venres, 23 de xuño, coincidindo coa Noite Meiga.

Os mozos e mozas que participen na actividade aprenderán, por unha banda, que herbas adoitan compoñer o tradicional cacho: herba de San Xoán, fento, fiúncho, herba luisa, malva, romeu e codeso etc. Daránselles pautas para identificar a cada unha destas variedades, entregaráselles un ramo coas diversas herbas e explicaránselles cales son os pasos para elaborar a auga de San Xoán nas súas casas.

A identificación das herbas non será a única proposta da tarde. A OMIX ten preparada unha especie de xincana con varios xogos. O salto á fogueira será unha das propostas, explicándolles aos mozos e mozas cal é a tradición e como cumprila, ademais, dunha forma segura. Por último, os mozos poderán prepararse para formular os seus desexos e tamén para desfacerse das cousas negativas, tal e como marca a crenza popular.