Unha decena de veciñas en situación de desemprego tomaron parte, esta mañá, na xornada inaugural do programa Alicia. Esta iniciativa púxose en marcha desde a Concellería de Servizos Sociais e a través do Consorcio As Mariñas e a Fundación Mujeres cun claro obxectivo: mellorar as competencias e habilidades dixitais destas mulleres para axudalas na procura de traballo.

A concelleira de Servizos Sociais e Recursos Humanos, Landa Díaz, apunta que este tipo de medidas son “esenciais para dar a coñecer as diversas ferramentas que estas mulleres teñen á súa disposición e que lles poden abrir novas portas no mercado laboral”.

Ao longo do proxecto abordaranse diversos contidos, brindándolles ás participantes estratexias e consellos para utilizar as novas tecnoloxías como unha vía de procura de procura de traballo. Para conseguilo, ensinaráselles, entre outras cousas, a habilitar perfís profesionais nas principais plataformas de emprego.

O itinerario estará dividido en varias xornadas, celebrándose hoxe, mércores 16 de outubro, a primeira delas. As seguintes terán lugar o 30 de outubro e os días 4, 6, 11, 13, 18, 20, 25, 27 e 28 de novembro. As sesións estarán impartidas por expertas da Fundación Mujeres.