“A imaxe de hoxe deixa claro que a Galaicoi mira cara o pasado de Cambre, pero este é tamén un evento de presente e, sobre todo, de futuro”. Así pechou a presentación da VII Romaría Castrexo-Romana Galaicoi a alcaldesa de Cambre, María Pan. Fíxoo acompañada polo concelleiro da Axencia de Desenvolvemento Local, Patrimonio e Turismo, Ramón Boga, pola concelleira de Desenvolvemento Asociativo, Educación e Sanidade, María Carmen Pan Matos, por un nutrido grupo de representantes das asociacións que participarán na romaría e polos nenos e nenas da escola infantil A Fraga Encantada. A rexedora explicou que, a expensas do que se decida na Asemblea de Clans (venres, 19 de xullo, ás 18.00 horas), todo apunta a que castrexos e romanos, os dous bandos historicamente enfrontados, se darán batalla ata o domingo, día 21.
A loita entre as dúas faccións será, un ano máis, a temática central da Galaicoi, que chega á súa sétima edición. Desta forma, como explicou o edil de Patrimonio e Turismo, “buscamos poñer en valor o extenso patrimonio histórico de Cambre e, particularmente, a pegada que estas civilizacións deixaron no noso municipio”. Boga iniciou no “gran arraigamento” que a cita ten entre os veciños e veciñas, algo que se reflicte nas cifras de participación. O edil apuntou, así mesmo, o impulso que se lle consegue dar ao tecido económico do municipio”.
Encontro social
A Galaicoi destaca como celebración histórica, pero tamén como un evento social. Desta forma, como sinalaron tanto a alcaldesa como a concelleira de Desenvolvemento Asociativo, un dos aspectos máis importantes “é a súa esencia como romaría”. Así, ao longo das tres xornadas do evento, o campamento castrexo (situado no castro) convértese en punto de encontro e convivencia para asociacións veciñais, culturais, deportivas e tamén para particulares procedentes de todas as parroquias. En total, o Concello recibiu 40 solicitudes para ocupar as clásicas cabanas castrexas ou para solicitar os taboleiros para a romaría. A maioría (22), tramitáronse por parte do tecido asociativo, mentres que o resto procederon de particulares. María Carmen Pan Matos valorou estes números, que deixan claro “que esta romaría segue a ser unha ineludible para vos veciños e veciñas de Cambre”.
Precisamente, á presentación de hoxe acudiron varios representantes dalgunhas das asociacións que participarán nesta sétima romaría: Asociación de Amas de Casa de Bribes, Asociación Avepace de Pravio, Asociación Ganduxo de Pravio, Aires de Sigrás, Asociación A Unión de Brexo-Lema, Grupo de Cantareiras As Avelaíñas da Asociación Cultural de Santa María do Temple, Grupo de Gaitas A Randeira da Rocha e a Asociación Histórico-Cultural Gallaecia Viva.
A Romaría Castrexo-Romana Galaicoi comezará este venres, 19 de xullo, e prolongarase ata o domingo, día 21. En canto ao horario, o venres será de 17.00 a 1.00 horas, o sábado de 11.00 a 14.00 horas e de 16.30 a 1.00 horas e o domingo, de 11.00 a 14.00 horas e de 17.30 a 21.00 horas.
Asemblea de clans
O programa arrincará o venres, ás 18.00 horas, coa asemblea de clans. Nela, os xefes de cada agrupación reuniranse para abordar unha cuestión capital: a chegada dos romanos a Cambre. Na reunión deberán decidir se acoden ou non á guerra e se elixen esta última, a guerra declararase ás 19.00 horas, dando paso a unha batalla que se prolongará ata o domingo, 21 de xullo, cando asinarían o tratado de paz.
O programa incluirá mercado con preto de medio centenar de postos, talleres, guerras e escaramuzas, desfiles, pasacalles e actividades de animación musical, concerto dos Pelepau (venres, 19, ás 23.00 horas) representacións teatrais etc.
Actividades infantís
O Concello organizará, ademais, numerosas propostas para os nenos e nenas. O programa infantil contará con estacións con xogos tradicionais e reciclaxes e tamén campionatos castrexos con diferentes probas físicas. As propostas infantís comezarán o propio venres pola tarde e sucederanse ao longo de toda a fin de semana.