Vila Concepción acolleu, onte, a inauguración da primeira exposición dentro do programa ‘Historias detrás dun cadro’. A iniciativa, que estará en marcha ata o mes de marzo de 2024, reunirá o traballo de máis dunha trintena de pintores e pintoras profesionais e amateurs. A idea, como explicou o concelleiro de Cultura, David Saborido, “é crear un espazo de convivencia no que todos estes artistas poidan compartir espazo e mesmo crear sinerxías”.
Esta primeira mostra, dispoñible ata o 14 de decembro, está conformada polas obras de Merche Ramos e tamén de Beatriz Alonso de Vega, Antonia Amenedo, Nélida Barros, Cristina Bellón, Josefina Mosquera e Mª Encina Sánchez. Delas, seis foron alumnas das clases de pintura de Vila Concepción das actividades socioculturais do concello. Esta colección dará paso á seguinte, contando, para iso, con outros artistas e, así, sucesivamente ata marzo.
O acto de onte incluíu, non só a propia inauguración, senón tamén unha charla para coñecer ás autoras das creacións. Durante a súa intervención, David Saborido, sinalou que o proxecto busca cumprir varios obxectivos: “queremos sumar novas propostas culturais para a veciñanza e que Vila Concepción poida servirlles a estes artistas de escaparate para presentar as súas creacións”. Con todo, máis alá do valor expositivo, Saborido incidiu en que con esta proposta se pretende tamén “que a cidadanía poida coñecer aos autores e autoras que se atopan detrás de cada cadro, algo que se conseguirá por medio de charlas”.
