A Casa da Cultura Vila Concepción acollerá este xoves, 5 de outubro, ás 20.30 horas a proxección do documental Cardoña fotos a 7 pesetas. A peza está dirixida polo xestor cultural, Carlos Lorenzo, e céntrase nun dos fotógrafos máis populares entre os anos 40 e 80: José Gestal, máis coñecido como Cardoña. Ao longo do documental abórdanse temas como os seguintes: chegada da fotografía a Galicia e fotógrafos populares, inicios de José Gestal, o papel da súa muller, dona María, no laboratorio fotográfico, fotografía de defuntos, campañas para facer o DNI polas aldeas, arquivos fotográficos e recoñecemento público de Gestal. Para lograr esta aproximación á fotografía, no documental interveñen a filla de Cardoña, Matilde Gestal, os fotógrafos, Xurxo Lobato e Xoán Piñón, o fotohistoriador, Carlos Castelao, e o investigador e fotógrafo, Manuel Sendón. Ademais da propia proxección, a actividade incluirá tamén un coloquio co director, Carlos Lorenzo, que responderá as preguntas do público asistente. A iniciativa forma parte da programación 4×3 de outono da Deputación da Coruña. O acceso a esta proxección é libre e gratuíto.