A xornada comezará ás 10.00 horas cunha breve presentación. Ás 10.30 horas levarase a cabo o café-diálogo Miradas, a cargo da fundadora de Ffotoeduca, Mariola Mourelo. Ás 11.30 horas está previsto o inicio da sección de Conversas, na que intervirán as seguintes relatoras: María Ferreiro, da Secretaria das Mulleres do Sindicato Labrego Galego; Olga Romasanta, de Rexenerando S. Coop.; Noelia Darriba, de Atalaias; Araceli Macías, de Outonía S. Coop. Galega. A última parte da actividade arrincará ás 13.30 horas con Trenzadas, un laboratorio de traballo.
EspadELA, trenzar rural e feminismos está aberta á participación de toda a cidadanía. A actividade é gratuíta, pero as persoas interesadas terán que inscribirse a través do formulario correspondente.
O traballo das xornadas derivará nunha publicación onde se visibilizarán os contidos. A idea é que esta publicación plasme e transmita o mapa dos proxectos que se están levando a cabo no contexto rural galego.
Escola de Apoderamento Feminista
A Escola de Apoderamento Feminista de Mulleres do Rural (EspadELA) está presente en Cambre desde o mes de outubro a través da celebración de sesións formativas. Ao longo das mesmas, as mulleres participantes están a traballar temáticas como a prevención das violencias machistas, o liderado, a autoestima, etc.
A concelleira de Benestar Social, Lúa Sanguiñedo, sinalou a “importancia” desta iniciativa, “coa que se está creando unha auténtica rede de apoio e de intercambio de ideas e coñecementos entre as mulleres que toman parte nesta Escola de Apoderamento”.