Vila Concepción converterase, nos próximos meses, nun auténtico berce da arte ou, o que é o mesmo, nun centro de exposicións no que se dará a coñecer o traballo de máis de 30 pintores e pintoras. Baixo o nome Historias detrás dun cadro, a iniciativa ofrecerá varias mostras de diversos artistas desde novembro ata marzo de 2024. A primeira chegará á Casa da Cultura o martes, 28 de novembro, e estará dispoñible ata o 14 de decembro. Esta estará conformada polas obras de Merche Ramos e tamén de Beatriz Alonso de Vega, Antonia Amenedo, Nélida Barros, Cristina Bellón, Josefina Mosquera e Mª Encina Sánchez.

O concelleiro de Cultura, David Saborido, sinala que este proxecto busca cumprir varios obxectivos: “queremos sumar novas propostas culturais para a veciñanza e que Vila Concepción poida servirlles a estes artistas de escaparate para presentar as súas creacións”. Con todo, máis aló do valor expositivo, Saborido incide en que con esta proposta preténdese tamén “que a cidadanía poida coñecer aos autores e autoras que se atopan detrás de cada cadro, algo que se conseguirá por medio de charlas”. O concelleiro explica que un dos valores engadidos deste programa é que “revelará o traballo artístico de veciños e veciñas, permitíndonos coñecer o que temos na nosa contorna máis próxima”. O edil apunta, así mesmo, que o 90 % dos traballos que se exhibirán “levan a firma de mulleres e, en moitos casos, de veciñas de Cambre”.

Espazo de convivencia

A dinámica de cada mostra será idéntica. Na xornada inaugural, o público asistente poderá gozar, non só dos cadros, senón que tamén terá a posibilidade de coñecer aos artistas para saber que hai detrás de cada creación. En cada exposición haberá pezas feitas por profesionais e outras realizadas por amateurs, favorecendo, desta forma, “que compartan espazo e que poidan crear sinerxías entre eles”, explica o responsable de Cultura.

A primeira terá lugar o 28 de novembro. A inauguración será ás 19.30 horas e a charla coas pintoras ás 20.00 horas. Poucos días despois de concluír a primeira mostra, o Concello dará paso á seguinte contando, para iso, con outros artistas e, así, sucesivamente ata marzo.

Ao longo do ciclo, a Casa da Cultura recibirá o traballo de profesionais e auténticos referentes dentro do sector como, por exemplo, o de Suso Cubeiro. Con todo, haberá espazo tamén para mostrar as creacións de artistas amateurs.