En Cambre, o aninovo vén da man da terceira exposición de pintura do programa Historias detrás dun cadro. A mostra arrincará o vindeiro xoves, 11 de xaneiro, en Vila Concepción e servirá para dar a coñecer o traballo destes seis artistas: Juan Massana, Ayla Couto Miranda, Luis Laranga, Luis Sousa Negreira, Begoña Gago Edreira e Beatriz Blanco Martín.

O propio xoves terá lugar o acto de inauguración da exposición, que incluirá, como en anteriores entregas, unha charla cos autores e autoras. Así, a apertura da mostra será ás 19.30 horas, mentres que o coloquio chegará ás 20.00 horas. Trátase dunha dinámica coa que o concelleiro de Cultura, David Saborido, busca que os veciños e veciñas poidan coñecer “non só a obra, senón tamén a quen se atopa detrás dela”.

Esta terceira exposición poderá visitarse ata o 26 de xaneiro. Cando conclúa, dará paso á seguinte e, así, sucesivamente ata marzo de 2024.

A dinámica de cada mostra será idéntica. Na xornada inaugural, o público asistente poderá ver as pinturas e tamén terá a posibilidade de coñecer aos artistas para saber que hai detrás de cada creación. En cada exposición haberá pezas feitas por profesionais e outras realizadas por artistas amateurs como, por exemplo, as do alumnado das clases de pintura das actividades socioculturais do Concello e as da Asociación de Santa María do Temple.