A Oficina Municipal de Información Xuvenil (OMIX) de Cambre organiza, dentro do seu programa “Por fin é venres”, catro talleres relacionados co anime ao longo do mes de novembro.

Todas as actividades son gratuítas e levaranse a cabo os venres na Casa dás Palmeiras, de 17:00 a 20:00 horas. As inscricións xa están abertas e poden realizarse a través da páxina web http://omix.cambre.es/.

A primeira iniciativa terá lugar o venres 8 de novembro, cunha serie de torneos de xogos para móbiles en liña, xogos de mesa, karaoke e Just Dance.

As propostas continuarán o venres 15 de novembro, coa proxección da película “O castelo ambulante” de Studio Ghibli. Ademais, ese día poñeranse a proba os coñecementos de anime das persoas asistentes cun xogo de preguntas.

Por outra banda, o venres 22 de novembro despregarase toda a creatividade dos máis novos, cun taller de debuxo de personaxes de anime e Pokémon, dobraxe e creación de voces.

Por último, o venres 29 de novembro terá como temática central o K-pop, con música, xogos, baile e diversión da man do grupo Kimchimochi.

As persoas interesadas en recibir máis información poderán chamar ao 981 650 269 ou escribir un correo a pixtemple@cambre.org.