Volven os campamentos de verán da Oficina Municipal de Información Xuvenil (OMIX). A oferta incluirá propostas para mozos e mozas de entre 7 e 17 anos. Con respecto a outras edicións, tivéronse en conta os prazos dos campamentos que organizan desde a Xunta de Galicia. Desta forma, o período de solicitude para os de Cambre abrirase unha vez pechado o prazo concedido polo organismo autonómico. Con esta novidade, búscase garantir que as familias teñan máis alternativas de conciliación ao seu alcance.
A primeira actividade terá lugar os días 29 e 30 de xuño. Nesas xornadas, levarase a cabo unha acampada en Guitiriz (na zona de Sete Muíños) dirixida a nenos e nenas nacidos en 2015 e 2016.
Entre o 1 e o 6 de xullo celebrarase a actividade Pequenos/as, para nenos e nenas nados/as entre o 2011 e o 2014. Neste caso, o destino será Portonovo, onde está prevista a realización de saídas e excursións ademais de actividades acuáticas. Portonovo será tamén o lugar no que terán lugar os campamentos de Maiores (para mozos nados/as entre o 2006 e o 2010). Esta última proposta terá lugar entre o 11 e 22 de xullo.
O prazo de solicitude estará habilitado entre o 5 e o 15 de maio a través dos rexistros de entrada e da sede electrónica. Proximamente publicarase toda a información sobre a convocatoria.