A alcaldesa de Cambre, María Pan, participou esta mañá no acto do 25 aniversario da asociación de empresarios do polígono Espírito Santo, que conta con máis de 200 empresas e máis de 4.000 traballadores e traballadoras, e que é “un referente industrial na área metropolitana da Coruña”, tal e como sinalou a rexedora.

A primeira edil estivo acompañada no evento polo presidente da comunidade de propietarios, quen foi o administrador xeral, Isaac Rodríguez, e quen lle substitúe no posto na actualidade. Tamén asistiu o escultor Miguel Couto, quen fixo a obra que preside a rotonda do polígono, e os ex alcaldes Antonio Varela e Óscar García Patiño.

Durante o acto, María Pan incidiu na importancia da tramitación do PXOM para “pensar nas posibilidades de crecemento” do recinto industrial. “Cremos que é importante seguir apostando por este polígono, que ten unha ubicación extraordinaria e que conforma, xunto co de Sada e o de Bergondo, o pulmón industrial da comarca. Por iso, no Plan Xeral que se está a tramitar, o goberno de Cambre aposta por dúas novas fases de solo industrial nesta ubicación”, sinalou a primeira edil.

Ademais, a rexedora recalcou a aposta do Concello “por ofrecer chan industrial” e pola conectividade a través da vía Ártabra, “chave para mellorar as comunicacións cara ao porto exterior e cos polígonos de Arteixo e A Coruña”. “Sabemos que isto é fundamental para que, unha vez xerado o chan necesario, as empresas sigan elixindo o polígono do Espírito Santo para asentarse, garantindo así un crecemento económico e de oferta de emprego que redundará no beneficio de todo o municipio”, lembrou María Pan.