Os controis leváronse a cabo nas sendas que entrañan un maior risco para o viandante.

A Policía Local acaba de concluír a súa última campaña, na que puxo o foco, de novo, na seguridade viaria. Nesta ocasión, os axentes municipais centraron esforzos en evitar o uso do teléfono móbil por parte dos condutores mentres estes están parados nos pasos de peóns. A iniciativa, en marcha desde as últimas semanas, saldouse cunha decena de multas que se interpuxeron nos pasos de peóns urbanos. Así, tras a realización dunha análise das diferentes sendas do municipio, estas tarefas leváronse a cabo nas que entrañan un maior risco para o viandante. Isto é, naqueles puntos nos que non só se rexistra máis afluencia de vehículos, senón tamén de peóns.

A Policía realizou estes labores tendo en conta as últimas medidas introducidas pola Lei 18/2021 e que modifica a Lei de Seguridade viaria. Estas novidades contemplan a detracción de seis puntos cando se circule suxeitando na man o teléfono móbil. A multa será de tres puntos cando o dispositivo se manipule nun soporte ou similar. As contías por estas infraccións son de 200 euros (100 euros por pronto pago) segundo o artigo 76, apartado g) do RDL 6/2015 da Lei de Seguridade viaria.

Para realizar estes controis, os axentes municipais colocáronse en puntos nos que dispoñían dunha boa perspectiva sobre os condutores.