A colaboración entre os veciños e veciñas e as forzas e corpos de seguridade e emerxencias favoreceu, onte, o rescate de dúas persoas que sufriran un accidente na estrada que conecta Altamira e Castelo. O Servizo Municipal de Emerxencias de Cambre recibiu, ao redor das 21.55 horas, un aviso no que se lles informaba de que un vehículo impactara contra un muro, saíndose da vía e acabando na zona da cuneta.

Cando chegaron ao lugar do incidente, os residentes da zona xa lograran sacar do automóbil ao condutor. O Servizo de Emerxencias de Cambre procedeu entón a sufocar as chamas que se produciron no coche por mor do impacto.

Durante o seu relato, o condutor indicara que viaxaba só. Con todo, tras oír ruído nas proximidades do incidente, a agrupación e os veciños realizaron unha procura para comprobar de onde procedía o ruído. Finalmente, ao redor das 00.10 horas e a uns 6 metros do lugar do impacto, localizaron a unha segunda persoa que, previsiblemente, sairía disparada polo portelo do copiloto.

No accidente interviñeron tamén os Bombeiros de Arteixo, a Garda Civil e o servizo de ambulancias do 061.

O concelleiro de Seguridade Cidadá, Daniel Mallo, agradece a colaboración dos veciños e veciñas “esencial durante todo o dispositivo, así como o incrible labor do Servizo Municipal de Emerxencias, cuxa profesionalidade e perseveranza permitiu localizar e rescatar á segunda vítima”. O edil agradece, así mesmo, o traballo do resto de corpos e forzas de seguridade e emerxencias que cooperaron na intervención.