A Policía Local e o Servizo Municipal de Emerxencias atenderon medio cento de incidencias nas últimas horas

17 Xan 2023

Tamén che pode interesar

O temporal de vento e choiva está a deixar un reguero de incidencias en todo o termo municipal. En total, entre a Policía Local de Cambre e o Servizo Municipal de Emerxencias contabilizan preto de 50 intervencións desde onte, luns 16. A maioría, relacionadas con caídas de árbores, desprazamentos de contedores, caída de postes eléctricos, etc.

As incidencias sucedéronse nas últimas horas en practicamente todo o termo municipal: en Bribes, Sigrás, na zona do Pombo (Pravio), na Fontenla, Bandebó, San Lourenzo, A Barcala, Cambre, etc. A maiores, os servizos de emerxencias tiveron que asistir a un motorista que sufrira un accidente na rúa Polígono (O Temple).

Ademais das caídas de árbores, rexistráronse tamén problemas polo enchido e desprazamento de arquetas, caídas de muros e noiros e rotura de postes eléctricos.

Ante a previsión meteorolóxica dos próximos días, o Concello pechou, de forma preventiva, os parques e instalacións exteriores. A maiores, suspendéronse todas as actividades ao aire libre para minimizar calquera risco.