Os feitos producíronse o domingo, pola mañá, nas inmediacións do parque infantil da Rañoa, na urbanización A Barcala. Unha patrulla vixiaba a zona nun coche camuflado cando viron ao mozo con actitude sospeitosa. Nese momento, os axentes municipais decidiron seguirlle os pasos e, finalmente, descubrírono realizando a pintada no portal dunha vivenda da zona.
O mozo, natural de Cambre, foi denunciado por incumprir a ordenanza de limpeza viaria e ornato público. En concreto, a realización de gratifis está tipificada como unha falta grave e pode supoñer unha multa de ata 1.500 euros.
Nos últimos meses, a Policía Local intensificou os labores de vixilancia para previr este tipo de condutas. O reforzo destas tarefas saldouse coa interposición de seis denuncias desde o mes de xullo.