A súa muller informou os axentes municipais de que o home non regresara ao seu domicilio despois dunha hora e media.
A intervención da Policía Local de Cambre foi decisiva para localizar a un veciño con principios de demencia que se desorientara e non regresara ao seu domicilio. Os feitos tiveron lugar onte, cando unha veciña de Cambre informou de que o seu marido, de 74 anos e con principios de demencia, non volvera á súa vivenda.
Segundo a información proporcionada pola muller, o home mantén unha rutina diaria, polo que, tendo en cuenta o seu estado de saúde e tras hora e media sen ter noticias del, decidiu contactar coa Policía Local.
Os axentes municipais trasladaron a información tanto a Protección Civil como á Garda Civil para coordinar o dispositivo de busca. Finalmente, e tras a realización de varias pescudas, conseguiuse localizar ao home na Coruña, ata onde se desprazou unha patrulla da Policía Local para axilizar a intervención. O home, que se atopaba en bo estado pero algo alterado, reuniuse coa súa muller e o seu fillo.
