• O Goberno central acaba de conceder unha subvención ao Concello de 1,6 millóns de euros para a realización destas obras.
• A axuda servirá para crear esta instalación na cuberta e para renovar por completo esta dependencia, converténdoa nunha edificación nZEB.
• O alcalde, Óscar García Patiño, recibiu, esta mañá, á subdelegada do Goberno, María Rivas, a quen agradeceu “a boa disposición e a colaboración para executar este proxecto”.

A futura rede de autoconsumo enerxético do pavillón Os Campóns producirá 195.000 kWh/a e abastecerá á propia instalación deportiva e ás dependencias municipais que estean a medio quilómetro de distancia. O Goberno central acaba de conceder ao Concello unha axuda de 1,6 millóns de euros para a execución deste ambicioso proxecto co que levará a cabo, ademais, a renovación integral desta dependencia. O alcalde, Óscar García Patiño, recibiu, esta mañá, á subdelegada do Goberno, María Rivas, que se desprazou ao municipio para falar sobre esta subvención. García Patiño agradeceu “a boa disposición e a colaboración do Goberno para executar este proxecto”, que cualificou como “esencial” para seguir apostando “pola sostibilidade e polo emprego dás enerxías renovables”.

En Os Campóns, o proxecto supoñerá converter a edificación nun nZEB (nearly Zero-Energy Building). Isto é, nunha construción cun nivel moi alto de eficiencia enerxética e confort. Para logralo, a cuberta do pavillón contará cunha instalación de 600 placas solares capaz de producir 195.000 kWh/a. Esta cubrirá tanto o consumo da dependencia como o doutros inmobles situados a menos de medio quilómetro de distancia: a Oficina Municipal de Información Xuvenil (Casa Arrigada), a base de Protección Civil David Pisani, a Escola de Música Sementeira Cambre, o local social de Sigrás e o CEIP Gonzalo Torrente Ballester. Con todo, as intervencións abarcarán tamén melloras en canto ao illamento, á iluminación, ao control solar, accesibilidade e aproveitamento enerxético e hídrico.

A fachada exterior renovarase completamente, instalando unha envolvente unificadora mediante láminas de madeira local, un material que garante a circularidade do proceso construtivo e que ten, ademais, un baixo custo de mantemento. Esta envoltura garantirá un mellor acondicionamento térmico e evitará a suba das temperaturas do edificio. As obras implicarán tamén a redefinición dos ocos da fachada, propiciando unha racionalización lumínica. A proposta do goberno local propón melloras na accesibilidade co fin de darlle un maior protagonismo e prioridade ao peón. Así mesmo, exponse melloras de usabilidade na pista polideportiva e nas bancadas, asegurando a correcta renovación do aire e o confort dos usuarios e usuarias. A iniciativa supoñerá, por último, a instalación dun sistema BMS (Building Management System) co que se automatizarán e controlarán os consumos, a climatización e a iluminación.

Unha liña de traballo
Durante o encontro, o rexedor sinalou que, ademais do de Os Campóns, o Concello presentou outros dous proxectos ao Programa de Impulso á Rehabilitación de Edificios Públicos (Pirep local): un no CEIP Wenceslao Fernández Flórez e outro no de O Graxal. Como no caso do pavillón, se o Concello recibe as axudas estatais, as obras implicarían dúas liñas de actuación: por unha banda, a renovación completa dos edificios e, pola outra, a creación de redes de autoconsumo enerxético nas cubertas dos centros de ensino.

Con esta iniciativa, o goberno local mantén a súa aposta por poñer en marcha accións que promovan o respecto e o coidado do medio ambiente. Un compromiso que se cumpre coa renovación da frota municipal de vehículos con coches eléctricos e co proxecto para implantar a iluminación LED en Cambre, O Temple, A Barcala e no polígono industrial do Espírito Santo. Estas obras, que xa están en marcha, están a realizarse cunha axuda do Instituto para a Diversificación e Aforro da Enerxía Eléctrica (IDAE).