Albóndegas de cabaciña e ensalada rusa de coliflor conformaron o menú da primeira xornada do programa ‘Come ben, vive san’. Baixo o título, Verduras atractivas, a dietista e experta en alimentación, Carolina Mosquera, ensinou ás persoas participantes os ingredientes e pasos a seguir para crear ambas as receitas. Nesta primeira actividade tomou parte, ademais, a nutricionista do centro de saúde de Cambre, Rita Allegue, que explicou como funciona o servizo de asesoramento sobre nutrición que realizan desde o propio ambulatorio, informando os veciños e veciñas sobre como poden acceder ao mesmo.
O programa desenvolverase ata o venres, 21 de abril, na aula Portomuíños da Barcala (de 19.00 a 20.00 horas). Cada xornada estará centrada en cuestións diferentes:
- Martes, 18 de abril: cociña con legumes
- Mércores, 19 de abril: tuppers saudables
- Xoves, 20 de abril: receitas rápidas saudables
- Venres, 21 de abril: sobremesas sas
Ao finalizar a actividade do venres, realizarase un sorteo de tres agasallos entre as persoas participantes en todas as xornadas. En concreto, sortearanse unha fritideira de aire, unha lékué para cociña en vapor e un libro de receitas sas.