Fortalecer a autoestima a través dunha perspectiva de xénero. Ese foi o obxectivo central do último taller organizado a través do programa Píllara. A iniciativa chegou a 13 mulleres do municipio.

En total, leváronse a cabo sete sesións entre os meses de febreiro e marzo. A iniciativa xurdiu por mor dunha solicitude das propias participantes, que xa tomaran parte dun taller sobre competencias parentais en novembro e decembro centrado tamén en autoestima pero, neste caso, na dos fillos e fillas.

Ao longo desta acción abordáronse cuestións como as seguintes: definición de autoestima e influencia social e cultural na mesma, técnicas de autocoñecemento, conceptos como a resiliencia e sororidade e a xestión emocional e a asertividade.

Programa Píllara

O programa Píllara conta cunha educadora social con dedicación completa que traballa seguindo estas liñas de actuación:

• Ofrecer atención individualizada e apoio psicosocial a persoas e familias usuarias dos servizos sociais comunitarios dentro do programa de educación familiar.
• Organizar actividades de educación e apoio familiar para favorecer a adquisición de habilidades sociais, de organización doméstica e competencias parentais.
• Realizar un seguimento do proxecto de intervención de cada persoa/familia.
• Derivar a outras axencias e organizacións que ofrecer servizos especializados en Cambre e na comarca, como atención psicolóxica, asesoramento xurídico, orientación laboral, formación, etc.
• Promover a igualdade de oportunidades e a corresponsabilidade nas familias a través de todas as actuacións do programa.
• Promover a participación das familias á vida comunitaria, así como a visibilización da contribución social que fan á súa contorna.

O programa está subvencionado pola Consellería de Política Social e conta co cofinanciamento da Unión Europea no marco do Programa Operativo Fondo Social Europeo (FSE) Galicia 2014-2020.