O Concello e os IES Afonso X O Sabio e IES David Buján organizan unha nova edición do Certame Literario Xoán Díaz. O concurso, que leva xa trinta edicións, busca estimular a creatividade dos mozos e mozas de entre 12 e 30 anos.

O certame conta con tres categorías en función da idade: a A será para mozos e mozas de entre 12 e 14 anos, a categoría B para os de idades comprendidas entre os 15 e os 18 anos e, por último, poderán participar na C os de 19 a 30 anos. Cada persoa poderá presentar unha proposta nalgunha das seguintes modalidades:

• Poesía: deberán presentarse tres poemas como mínimo e de tema e forma libres.
• Narración breve: a extensión máxima será de cinco páxinas por unha soa cara e a temática será libre.
• Microteatro: a extensión será de entre cinco e dez páxinas a unha cara e con temática libre.

En todo caso, todas as obras deberán estar escritas en galego e terán que ser orixinais e inéditas (non podendo, ademais, ter sido premiadas con anterioridade). Os traballos terán que presentarse a través da sede electrónica ata o luns, 15 de abril. A solicitude deberá indicar que vai dirixida ao servizo de Bibliotecas e no texto figurarán o pseudónimo, o título da obra e a categoría. Cada persoa deberá achegar, de maneira anexa, tres arquivos. No primeiro irá a ficha de inscrición, no segundo o DNI e no terceiro terá que figurar o traballo. Tras a deliberación do xurado, entregaranse dous premios por categoría e modalidade, aínda que o xurado poderá declarar deserto calquera deles no caso de considerar insuficiente a calidade dos traballos presentados.