Vila Concepción acollerá o 21 de marzo a inauguración da quinta e última exposición da iniciativa Historias detrás dun cadro. Nesta ocasión, a mostra recollerá o traballo pictórico de oito artistas: por unha banda, o de Paloma Díaz-Castroverde e o de Carmen Quiñoá, ambas as profesoras das actividades socioculturais do Concello e da Asociación Cultural de Santa María do Temple e, polo outro, as obras de Carmen López Redondo, Avelino Quintela, María Teresa Ponte, Adela López, Concepción Fernández e Rosario Esmorís, alumnos e alumnas das dúas mestras.

O concelleiro de Cultura, David Saborido, agradece a gran “disposición que amosaron as profesoras, ou alumnado e o resto de artistas convidados ao longo de todo este proxecto, xa que sen a súa implicación todo isto non tería sido posible”. Así mesmo, o edil valorou a “acollida que Historias detrás dun cadro tivo entre a veciñanza” e avanzou que non será a última actividade sobre pintura que levará a cabo na instalación municipal: “en vista do enorme interese, estamos traballando en propostas similares como charlas e seminarios sobre a arte e segredos ou detalles curiosos sobre cadros”.

A inauguración será o xoves, 21 de marzo, ás 19.30 horas. Con todo, ás 20.00 horas está prevista unha charla para coñecer aos autores e autoras da exposición. A mostra poderá visitarse ata o 4 de abril na dependencia municipal. Como broche final a Historias detrás dun cadro, o pintor, poeta e profesor Juan Massana impartirá un seminario sobre teorías da cor os días 2 e 3 de abril en Vila Concepción.