En Cambre, os libros saen ás rúas. Esa é a proposta do Concello para seguir impulsando a lectura entre a veciñanza. Unha premisa que o goberno local iniciou, hai uns meses, coa posta en marcha dun proxecto piloto de bookcrossing (intercambio de libros). A medida comezou coa disposición dunha caseta con numerosas obras no Parque da Igrexa. Porén, a iniciativa tivo tal éxito entre a cidadanía, que o Concello recibiu varias solicitudes para colocar elementos similares noutros puntos do termo municipal. Unha demanda que se acaba de cumprir coa instalación de novas casetas en boa parte do concello:

O Concello arrincou, onte, a colocación dos novos elementos, e a previsión é que as tarefas de instalación e dotación de exemplares poidan completarse nestes días. As novas casetas estarán situadas nos seguintes puntos:

• Bribes (inmediacións do cruceiro)
• Brexo-Lema (inmediacións do cruceiro)
• Cecebre (ao carón do monumento en homenaxe ao escritor Wenceslao Fernández Flórez)
• Pravio (na zona da unitaria de San Bartolomeu)
• Andeiro (na área do parque infantil)
• Santa María de Vigo (no parque infantil)
• O Temple (parque Manuel Lugrís)
• A Barcala (nas inmediacións do parque infantil)
• Sigrás (nas inmediacións do local social)
• Anceis (na contorna do local social)
• San Lourenzo (na zona do parque infantil e do local social)

A intención é darlle continuidade ao proxecto dispoñendo de novos elementos noutros puntos do termo municipal nos que está prevista a execución de próximas obras.

Baixo o nome de ‘Biblioteca na rúa’, o mecanismo desta iniciativa é sinxelo: os veciños e veciñas poden achegarse aos distintos lugares onde se localizan estas casetas e retirar algunhas das obras dispoñibles. A cambio, poderán depositar outra no mesmo. Desta forma, garantirase a continuidade do proxecto. Así, os lectores poderán gozar do libro nas proximidades do lugar ou, se o prefiren, levalo á casa para lelo.