O alcalde, Óscar García Patiño, recibiu ao delegado do Goberno en Galicia, José Miñones, que presentou esta nova liña de axuda.
O alcalde, Óscar García Patiño, e os concelleiros e concelleiras do goberno local recibiron, esta mañá, ao delegado do Goberno en Galicia, José Miñones. O obxectivo foi presentar a nova liña de subvencións para a dixitalización das entidades locais, da que Cambre recibirá 170.277 euros. O rexedor agradeceu ao delegado “a boa disposición e a colaboración entre ambas as administracións”, destacando que a contía permitirá “seguir apostando pola dixitalización e por achegarnos á veciñanza a través das novas tecnoloxías”.
Durante o encontro, García Patiño lembrou que o Concello xa dispón “de varias aplicacións móbiles que permiten cumprir con este obxectivo, como a app Avisos Cambre e da OMIX”. Ademais, o alcalde sinalou que “o WhatsApp segue en funcionamento, permitindo á cidadanía trasladar incidencias e recibir información municipal”. O primeiro edil avanzou que a contía recibida destinarase “a automatizar e simplificar procedementos dentro da administración local, buscando, como sempre, axilizar e darlles máis facilidades aos cidadáns e cidadás.
Pola súa banda, Miñones apuntou que esta convocatoria “é unha oportunidade única para promover a transformación dixital das administracións”, e cualificou a Cambre como “un referente neste proceso de dixitalización”. O delegado explicou que “o Plan de Recuperación do Goberno está chegando a todos os municipios de Galicia, con participación, transparencia e cooperación entre todas as institucións”.
Ademais de sobre esta liña, a reunión serviu para falar doutras das axudas que o Goberno central ten en marcha e da que poden beneficiarse os concellos.
Liñas estratéxicas
Con esta subvención, o Concello pode expor accións enmarcadas nalgunha das seguintes liñas estratéxicas:
- Orientada ao cidadán: mellorar os servizos públicos que prestan as entidades locais, favorecendo o uso e a accesibilidade dos servizos públicos dixitais, a modernización dos procesos e a capacitación.
- Operacións intelixentes: mellorar a calidade, cantidade e eficiencia dos servizos e procesos de xestión e tramitación das administracións públicas, a través da utilización de tecnoloxías de automatización intelixente.
- Goberno do dato: democratizar o acceso aos datos permitindo o libre acceso á información e a súa replicabilidad.
- Infraestruturas dixitais: dotar ás administracións locais das infraestruturas tecnolóxicas necesarias para a súa modernización, contribuíndo a desenvolver a conectividade dixital, a economía do dato e a intelixencia artificial nas administracións.
- Interoperabilidade de servizos básicos de administración dixital: garantir a interoperabilidade dun conxunto mínimo de servizos básicos de administración dixital (rexistro electrónico, notificacións electrónicas, facturación electrónica e integración de expedientes abertos e cartafol cidadán do sector público estatal).