O Concello favoreceu a conciliación de preto dun centenar de familias do municipio a través do programa Xogando no Nadal. A iniciativa, que se levou a cabo durante o período vacacional, estivo dirixida ao alumnado de 4º, 5º e 6º de educación Infantil, de toda Primaria e de 1º da ESO.

O concelleiro de Educación e Sanidade, Miguel Ángel Gutiérrez, incide en que este tipo de medidas son “esenciais” para garantir “que as familias poidan conciliar nos períodos vacacionais dos nenos e nenas, algo que tentamos conseguir co lanzamento de programas durante o verán, a Semana Santa e o Nadal”.

Xogando no Nadal celebrouse no CEIP Wenceslao Fernández Flórez e en dúas quendas: a primeira, os días 23, 26, 27, 28, 29 e o 30 de decembro, e a segunda, do 2 ao 5 de xaneiro de 2023. Ao longo do programa, os nenos e nenas puideron gozar de actividades lúdico-deportivas e culturais relacionadas co Nadal.

Ademais da propia asistencia dos pequenos e pequenas, as persoas que o solicitaron puideron acceder a servizos complementarios como o Mañanceiro, almorzo, comida e transporte.