Coincidindo co Día das Bibliotecas, o Concello puxo en marcha un proxecto piloto de bookcrossing. A iniciativa, posta en marcha de forma coordinada entre as áreas de Desenvolvemento Asociativo e a Concellería de Cultura, consiste en deixar libros en lugares públicos para que calquera lector poida recollelos, lelos e volver poñelos en circulación. Para facilitar e estender esta práctica entre a cidadanía, dispúxose unha caseta no Parque da Igrexa. A concelleira de Desenvolvemento Asociativo, María Carmen Pan Matos, confía en que os veciños e veciñas “non só retiren libros, senón que tamén aproveiten para deixar exemplares, enriquecendo así esta proposta”.
Baixo o nome Biblioteca na rúa, o mecanismo desta iniciativa é sinxelo: os veciños e veciñas poden achegarse ao Parque da Igrexa e retirar algunhas das obras dispoñibles nesta caseta. A cambio, poderán depositar outra no mesmo lugar. Desta forma, garantirase a continuidade do proxecto. Os lectores poderán gozar do libro nas proximidades do parque ou, se o prefiren, levarllo a casa para lelo.
