O Concello acaba de arrincar unha nova edición de dúas dos programas de Servizos Sociais para a atención de colectivos en risco de exclusión: Prisma e Amarí. O primeiro, enfocado á intervención socioeducativa con menores e adolescentes, mentres que o segundo está destinado á poboación xitana. O salón de plenos acolleu hoxe a presentación das iniciativas, que correu a cargo da alcaldesa, María Pan, da concelleira de Servizos Sociais e Recursos Humanos, Landa Díaz, e das técnicas en Integración social responsables dos proxectos, María Loira e Carla Sánchez, respectivamente, así como a coordinadora de Servizos Sociais, Ana Monje.
No acto, a rexedora subliñou a aposta do goberno por dar continuidade a este tipo de iniciativas, “sobre todo tendo en conta as cifras que o persoal técnico conseguiu a nivel asistencial e que reafirman a necesidade de manter este tipo de proxectos”. Na mesma liña, a concelleira de Servizos Sociais apuntou que programas así son “clave” para “promover a igualdade de oportunidades”, avanzando que, proximamente, se iniciarán outros proxectos “cos que nos dirixiremos a outros colectivos en risco de exclusión social, ampliando así o abano de persoas que se poden ver beneficiadas destas accións”.
Inserción sociolaboral dos mozos
Por unha banda, Prisma persegue un claro obxectivo: a inserción laboral e social de mozas de entre 16 e 25 anos que se atopan fóra do sistema de educación regrado. Para lograr este obxectivo, o persoal traballa con mozos e mozas desde diferentes áreas de intervención: a laboral (por medio de orientación e axuda na procura de emprego), a educación formal (derivación de competencias clave e orientación académica), educación non formal (información e asesoramento sobre programas de voluntariado e/o actividades formativas de lecer), sanitaria (proporcionando asesoramento acerca de relacións afectivo-sexuais, prevención de consumo de drogas etc.), lecer (estimulando a participación dos mozos nas actividades da OMIX de Cambre) e convivencial (intervención e mediación familiar e realización de visitas domiciliarias).
Desde a súa posta en marcha no ano 2018, conseguíronse resultados. Así, desde ese ano, atendeuse a 86 mozos. Do total, lográronse 37 insercións laborais e outros 32 usuarios e usuarias retomaron os seus estudos. Estes números son froito do traballo dunha técnica en Integración social que se encarga de impartir talleres sobre diferentes temáticas e que se encarga de atender de maneira personalizada a cada participante realizando seguimentos e derivacións a outras administracións cando é preciso.
Inclusión da etnia xitana
Outro dos programas que continuarán será Amarí (nosa en caló), co que o Concello busca promover a inclusión social das familias xitanas de Cambre. A iniciativa púxose en marcha por primeira vez no ano 2022, atendendo a 72 persoas, incluíndo tanto nenos/as como adultos.
En liñas xerais, Amarí buscará cumprir os seguintes obxectivos: apoiar o desenvolvemento dos dereitos fundamentais e mellorar a calidade de vida das persoas xitanas, promover a igualdade e o desenvolvemento da muller e, por último, garantir a súa efectiva igualdade de oportunidades. Para cumprir con estas liñas mestras, o programa terá un carácter educativo, integrador, sensibilizador, de mediación e preventivo.
Unha vez que apareza un caso, a traballadora e a educadora social elaborarán, xunto coa técnica de integración social, un proxecto de atención individual para traballar as diferentes áreas de actuación: saúde, educativo formal, educativo non formal, convivencial, lecer e laboral. Para conseguir estas liñas mestras, a técnico en Integración social interveu coas persoas participantes en accións como a realización de diferentes xestións telemáticas (solicitude de citas no rexistro, na Seguridade Social ou no Sergas), dar apoio para cubrir a documentación necesaria para realizar distintas xestións, información e asesoramento sobre actividades de formación, mediación con diferentes centros educativos para previr condutas racistas fronte aos alumnos/as de etnia xitana, apoio na elaboración do currículo vitae, visitas domiciliarias etc.
Os programas Prisma e Amarí están cofinanciados pola Unión Europea no marco do Programa Operativo do Fondo Social Europeo (FSE+) Galicia 2021-2027. O obxectivo temático é a “Inclusión Social e loita contra a pobreza”.
As persoas que desexen obter máis información ou participar nestes proxectos poden contactar co departamento de Servizos Sociais a través do 981 65 48 12 e do correo electrónico ser_sociales@cambre.org.