Cambre estreará, esta semana, o seu novo programa de lecer de verán, Cinema á fresca. Como parte da iniciativa, o Concello realizará varias proxeccións para todos os públicos e ao aire libre, sempre que a previsión climatolóxica o permita. Os dous primeiros filmes chegarán esta semana ao Parque da Igrexa e os dous seguintes, no mes de agosto, ao Ramón Barba e á praza Casares Quiroga da Barcala.

O programa inaugurarase este venres, 12 de xullo, ás 22.00 horas con Inspector Sun e a maldición da viúva negra, para público familiar. A obra está ambientada nun mundo de insectos paralelo ao dos humanos e no que o Inspector Sun, unha araña solitaria, lidera a súa última misión contra a súa archienemigo Lagosta Vermella antes de embarcarse nun merecido retiro. As súas vacacións acaban abruptamente cando o millonario Dr Spindelthorp aparece asasinado, abríndose así un caso no que estará en xogo o destino de toda a humanidade.

Ao día seguinte, sábado 13 de xullo, será a quenda de Matria. A proxección levarase a cabo ás 22.00 horas, pero ás 21.40 horas está previsto un coloquio a cargo da directora de fotografía e veciña de Cambre Lucía Catoira Pan. O seu traballo fotográfico en Matria valeulle para facerse co Mestre Mateo a mellor Dirección de fotografía, así como cun nomeamento nos Premios Goya. Durante a charla, a cambresa terá a oportunidade de contar, non só a súa experiencia nesta obra, senón tamén a súa traxectoria á fronte doutros proxectos. Lonxe de ser o seu único galardón, Catoira Pan conta con varios Mestre Mateo polo seu labor en Dhogs, Trote e ¿Qué hicimos mal? A maiores, conseguiu o Premio Cans 2020 á mellor Fotografía por 16 de decembro.

Matria está dirixida a público adulto e, nela, a protagonista é Ramona, unha muller de 40 anos que vive sumida nun contexto laboral e persoal precario. Así, fai malabarismos con múltiples traballos para manterse á boia e poder proporcionar un futuro mellor á súa filla Estrela. Pero cando a súa filla está preparada para tomar o seu propio camiño, a nai dáse conta de que, por primeira vez, pode facer algo por si mesma.

Agosto

No mes de agosto, a dinámica do ciclo será a mesma, pero cambiaranse os escenarios. O sábado, 24 de agosto, ás 22.00 horas proxectarase no Ramón Barba Lightyear, a película na que se revela a orixe do xa clásico heroe de Toy Story. Nesta ocasión, Buzz está atrapado nun planeta hostil a 4,2 millóns de anos luz da Terra e tentará volver a casa a través do espazo e o tempo.

Ao día seguinte (domingo, 25 de agosto ás 21.00 horas), a praza Casares Quiroga da Barcala acollerá ¡Salta!, tamén para público familiar. Nela, cóntase a historia de Óscar e Teo, dous irmáns moi distintos entre si e que viven nun modesto piso de barrio. A pesar das súas diferenzas, ambos lidan coa desaparición da súa nai, unha prometedora científica obsesionada cos buracos de verme.

A entrada para todas as proxeccións é libre ata completar aforo. As localizacións poderían modificarse en caso de mal tempo.