O Concello xa conta cos establecementos gañadores do XV Concurso de Escaparates de Nadal. Por unha banda, tras unha visita aos establecementos participantes nesta nova edición do Concurso e despois dunha intensa deliberación por parte do xurado profesional, LT51 Workspace fíxose co primeiro premio, JKids co segundo e Audison co terceiro. Nesta edición outorgáronse, ademais, dous accésits: La Casita del Árbol conseguiu o de ‘Máis sostible’, e  La Óptica del Temple o de ‘Adecuación do escaparate ao produto’. A isto hai que sumar, así mesmo, o premio da votación popular, que foi parar a mans da academia de inglés Everyday School of English.

O concelleiro de Desenvolvemento Socioeconómico, Diego Alcantarilla, felicita aos establecementos galardoados, aos que agradece “a súa implicación e esforzo neste tipo de iniciativas coas que se busca promover o consumo no tecido empresarial de Cambre nestas datas sinaladas”. Agradece do mesmo xeito “a participación de todos os establecementos e do tecido asociativo comercial, sen o que sería imposible ter desenvolvido esta iniciativa un ano mais”.

A XV edición do certame congregou a 36 negocios do termo municipal. De entre os participantes, o xurado emitiu o seu fallo concedendo os tres primeiros premios atendendo aos seguintes criterios: creatividade, orixinalidade e innovación da decoración; a orientación comercial da decoración, uso do produto e dificultade; a iluminación do establecemento e o impacto visual e a composición e adecuada distribución espacial. A adxudicación do accésit ás sustentabilidade realizouse a partir de criterios de economía sostible, respecto polo medio ambiente e uso racional dos recursos naturais e de materiais reutilizables, outorgándose o accésit á adecuación do escaparate ao produto considerando a relación entre a decoración do escaparate e os produtos ou servizos comercializados. Tendo en conta estes aspectos, e a partir do fallo do xurado e dos resultados da votación popular, elaborouse a seguinte relación de premiados:

• LT51 Workspace: 1º premio (1.000 euros).
• JKids: 2º premio (700 euros).
• Audison: 3º premio (500 euros).
• La Casita del Árbol: Accésit máis sostible (400 euros).
• La Óptica del Temple: Accésit adecuación ao produto (400 euros).
• Everyday School Of English: Premio votación popular (1.000 euros).