Casa Arrigada acolleu a presentación do evento, que contou coa presenza do concelleiro de Deportes e Xuventude, Daniel Mallo, as codirectoras, Moraima Núñez e Candela Mayer, e do profesor do IES David Buján, José Viñas.
Nove comisións conformadas por máis de 50 mozos. Así será a V Open Science, organizada polo Concello e o club XentD100cia do IES David Buján. A feira científica achégase, desta forma, ao seu quinto aniversario mantendo a esencia dos inicios. Desta forma, aínda que as codirectoras desta edición, Moraima Núñez e Candela Mayer, son as clases visibles da cita, detrás atópase un equipo de medio centenar de voluntarios de varios cursos do IES David Buján que últiman xa todos e cada un dos detalles da feira científica. Trátase dunha particularidade que o concelleiro de Deportes e Xuventude, Daniel Mallo, cualificou, esta mañá, como “característica diferencial” da Open Science con respecto a outros eventos científicos nacionais e mesmo internacionais.
A Oficina Municipal de Información Xuvenil, localizada en Casa Arrigada, acolleu, esta mañá, a presentación oficial da quinta edición, na que tomaron parte o concelleiro, as dúas codirectoras da Open Science, o profesor do IES David Buján, José Viñas, e un nutrido grupo de alumnos e alumnas do centro de ensino. Durante a súa intervención, Daniel Mallo agradeceu “o magnífico labor que estes mozos e mozas realizan para converter á Open Science nun evento de referencia que acaba de ser incluído na Semana do Desenvolvemento Sostible e que recibiu, ademais, o recoñecemento da ONU”.
Pola súa banda, as codirectoras explicaron as principais novidades de 2022, falando, ademais, das funcións de cada unha das comisións (xurado, espectáculos, acollidas, e-sports, drons, información, páxina web, talleres e deportes alternativos) e das actividades que conformarán a programación. Unha das diferenzas con respecto a anteriores edicións será a ampliación do programa que, este ano, contará con tres días de actividade. A outra será Cromo, bautizada na presentación como a mascota da Open Science. O personaxe estará moi presente na feira científica e o seu papel consistirá en animar o ambiente o sábado, 17 de setembro, e o domingo, día 18.
Actividades para todos os públicos
En canto ás propostas, as codirectoras explicaron que o programa deste ano incluirá as seguintes actividades: cafés científicos, disposición dun centenar de postos de divulgación, exposición de traballos de ciencia de estudantes tanto de Galicia como do resto de España e doutros países, talleres de R e de drons, e-sports, etc. Este ano incorpórase, así mesmo, o quidditch (deporte da saga de Harry Potter) como unha das actividades estrela durante a fin de semana.
O primeiro día da Open Science vivirase o venres, 16 de setembro, de 21.00 a 23.00 horas. A intención é que a xornada sirva como primeira toma de contacto cos estudantes estranxeiros. Os dous días seguintes, 17 e 18 de setembro, o programa contará con talleres, presentación de proxectos escolares, entrega dos premios OSC 2022 e con postos de divulgación (dos estudantes e de institucións).
Recoñecemento internacional
A Open Science está incluída dentro da Semana Europea do Desenvolvemento Sostible. A iniciativa, que inclúe propostas doutros 22 países, busca dar visibilidade ás actividades e eventos cunha liña de acción común: a promoción da sustentabilidade, da Axenda 2030 e os 17 ODS (Obxectivos de Desenvolvemento Sostible). Ademais, a feira acaba de ser recoñecida como actividade da Semana Mundial dos Obxectivos de Desenvolvemento Sostible da Organización das Nacións Unidas.