O alcalde, Óscar García Patiño, solicitou ao Comité de Folga da empresa Jardíncelas que centralice os servizos mínimos de limpeza no centro de saúde de Cambre, nos centros de educación infantil e primaria do municipio e nas bibliotecas. En ambos os casos, pídese á compañía que realice estas tarefas todos os días da semana. No caso do centro de saúde de Cambre, o Concello require a limpeza todos os días da semana (de mañá e de tarde), incluíndo as fins de semana. A maiores, demándase tamén a limpeza do Punto de Atención Continuada (PAC) todos os días da semana, en horario de mañá, e unha hora máis pola tarde. O mantemento do centro de saúde do Temple realízao, directamente, a Xunta de Galicia. O alcalde apunta que, nos últimos días (antes da convocatoria da folga), o Concello xa recibira queixas da coordinación do servizo de Atención Primaria nas que se informaba de que o tempo de limpeza do centro de saúde fora reducido en 2 horas e 15 minutos diarios. A maiores, indicábase que estes traballos deixaran de prestarse no PAC en horario de tarde. García Patiño incide en que o mantemento destas tarefas “é esencial, especialmente na situación actual, co repunte dos casos de gripe A e de covid-19”. Centros de ensino No caso dos colexios e bibliotecas, o Concello require que estas dependencias se hixienicen todos os días da semana, facendo especial fincapé nos aseos e nas zonas comúns. No caso dos edificios administrativos do Concello, solicitouse limpeza dous días á semana, centrándose tamén nos aseos e zonas comúns.