O alcalde, Óscar García Patiño, pide á Consellería de Infraestruturas e Mobilidade “que saque do caixón o Vial 11-17”, incidindo que se trata da “única solución para aliviar os problemas de tráfico que existen en Costa da Tapia”. Precisamente, esta proposta centra a alegación presentada polo Concello de Cambre ao Plan de Acción contra a contaminación acústica da rede autonómica de estradas da Xunta. O documento inclúe melloras en diferentes vías autonómicas e, entre elas, no tramo da AC-211 que discorre polo termo municipal.

O rexedor sinalou que as propostas que a Xunta expón para a vía ao seu paso por Cambre “son insuficientes e non van pór unha solución ao verdadeiro problema que sofren, día a día, os residentes da zona e as centos de persoas que pasan por este lugar”. Neste sentido, a iniciativa do organismo autonómico baséase en limitar a velocidade máxima permitida a 30 km/h, en repoñer o pavimento e en colocar nova sinalización. “Agradecemos que se vaian executar estes traballos, pero isto non vai supor un verdadeiro cambio”.

García Patiño sinala que o Vial 11-17, que partiría da N-VI e enlazaría coa Marisqueira sen necesidade de pasar por Costa da Tapia, preséntase como a única “solución á problemática”.

Instalación de turborrotondas

O alcalde solicita, ademais, unha resposta á iniciativa proposta polo Concello: a realización dun estudo por parte da Xunta para determinar a viabilidade de instalar dúas turborrotondas, unha no Paraugas e outra no acceso á AP-9. Ata o de agora, a petición do Concello non recibiu resposta algunha por parte do organismo.