O Apalpador rescatará lendas e mitos de todas as parroquias durante a súa xira polo municipio

9 Dec 2022

Tamén che pode interesar

As lendas, mitos e tradicións das parroquias serán o fío condutor da xira do Apalpador polo municipio. Trátase dunha iniciativa coa que o Concello busca promover a diversidade e achegar a cultura e a tradición popular a todos os recunchos do concello e que viviu, a súa primeira experiencia, no 2016. Nesta ocasión, este personaxe repetirá o seu particular circuíto, que se prolongará entre o 17 e o 30 de decembro e incluirá as seguintes paradas: Sigrás, Cambre, Andeiro, Cecebre, San Lourenzo, Bribes, Cela, Pravio, Anceis, A Barcala, Santa María de Vigo, O Temple, Brexo-Lema e Meixigo. En cada unha das localizacións, O Apalpador rescatará unha historia vinculada co lugar que relatará ao público asistente.

A transmisión destes contos será a última parte da proposta da Concellería de Cultura. Esta está enmarcada no proxecto de promoción da diversidade cultural, histórica, musical, etnográfica e paisaxística de cada núcleo de poboación desenvolvido pola animadora cultural, Leticia Couto, e é froito tamén dun intenso labor de documentación realizada, ao longo dos anos, polo concelleiro de Turismo e Patrimonio, Ramón Boga. Para chegar a este resultado, as asociacións de veciños tiveron un papel esencial, na medida en que contribuíron a buscar testemuños capaces de transmitir parte da tradición oral da súa parroquia. Moitas destas historias teñen a súa base en lendas populares pero, noutros moitos casos, os contacontos están baseados en narracións orais transmitidas polos propios veciños e veciñas. O catálogo de contos inclúe historias de medo e outras nas que os protagonistas son seres da mitoloxía galega como mouros e trasgos, entre outros. En canto aos escenarios, aparecerán xeografías concretas do termo municipal, como castros e fontes.

Entre as historias que se relatarán atópase, por exemplo, a que envolve á Casa da Cultura Vila Concepción (O Temple), onde, segundo as crenzas populares, aínda hoxe habita a pantasma de Chichina. O coñecido como Pozo da Campá será tamén protagonista dun dos contacontos. Trátase dun lugar situado no río Mero e utilizado, hai anos, como zona de baño e xogos. Con todo, as lendas revelan un escuro segredo: un túnel de máis dun quilómetro que conectaba o Pozo da Campá co castro de Cambre e que a xente empregaba para fuxir en caso de perigo.

O Apalpador ofrecerá, en cada parroquia, dúas sesións de contacontos: a primeira, dirixida a nenos e nenas de ata 8 anos e a segundo, para público de 9 anos en diante. As datas e lugares de cada actividade poderán consultarse na páxina web municipal.