O Concello saldou unha parte da débeda contraída con Augaservi. Grazas ao recoñecemento extraxudicial que se elevou ao pleno do pasado luns (e que foi aprobado co voto a favor de UxC e o PSOE), a empresa encargada da xestión da auga viu abonados 288.627,94 euros en facturas pendentes. Trátase, como incide a alcaldesa, María Pan Lesta, “dunha boa nova para o Concello e, sobre todo, para esta empresa, que verá polo menos saldada unha parte do que se lle debe”.
A rexedora xa defendera que o recoñecemento extraxudicial era “a vía máis áxil para solucionar a situación e evitar que se poña en risco un servizo tan esencial para a cidadanía como é o da auga”. Pan Lesta incidía, ademais, en que se trataba dunha forma contemplada “polo Consello Consultivo como alternativa á revisión de oficio e que é moi recorrida polos concellos”.
Con todo, o recoñecemento levouse a pleno no mes de marzo co informe en contra das habilitadas nacionais de Secretaría e Intervención, que entendían que a compañía debía seguir prestando o servizo aínda que non se procedese ao pago das facturas pendentes. Finalmente, debido a un erro de redacción, a proposta tivo que volver expoñerse no pleno do pasado luns, cando recibiu o voto favorable de Unión x Cambre, do PSOE e a abstención do resto de partidos da corporación.
Pago de débeda
A alcaldesa confía en seguir dando pasos para proceder ao pago da débeda cos provedores. A rexedora lembra que, xa en decembro, propúxose abonar a metade desta débeda en paralelo á revisión de oficio. Trátase dunha medida que se expuxo á titular do departamento de Intervención e que coincidía, ademais, coas recomendacións que a Valedora do Pobo emitiu en informe remitido ao Concello. Con todo, a habilitada nacional determinou que as cantidades non se podían abonar ata que non concluíse a revisión de oficio.
Pan Lesta incide en que o pago da débeda “é a máxima prioridade”. Trátase dun obxectivo que a primeira edil confía en resolver por medio de dúas vías. Por unha banda, coa liquidación do orzamento de 2023, un trámite no que xa se está traballando desde a área de Intervención. Unha vez se finiquite este procedemento, a intención da alcaldesa é elevar un novo recoñecemento extraxudicial no que se recollan todas as facturas sen abonar. En todo caso, Pan Lesta confía en que o Consello Consultivo se pronuncie antes con respecto aos primeiros expedientes que o Concello. A alcaldesa aclara que xa se está traballando na elaboración dun terceiro expediente que se remitirá ao organismo o máis axiña posible.
