Cambre busca combater a presenza de pragas a base de información. Trátase dun obxectivo que se espera conseguir coa organización de dúas xornadas nas que se falará sobre as principais patoloxías que as árbores ornamentais e forestais do municipio poden sufrir pola presenza de determinados insectos.

A concelleira de Medio Ambiente, Patricia Parcero, sinala que cada vez son máis “os veciños e veciñas que se poñen en contacto co Concello para informar dos problemas que sofren nos seus árbores por mor da procesionaria e do picudo vermello, entre outros, polo que cremos que a realización destas charlas é esencial para explicarlles as posibles solucións para minimizar o seu impacto”.

Ao longo das charlas falarase das seguintes cuestións: detección e solucións dos ataques da procesionaria aos piñeiros, métodos para combater ao picudo vermello e enfermidades que as distintas pragas provocan nas árbores froiteiras. Os relatorios estarán dirixidas por persoal experto na materia da empresa Endoterapia Vexetal.

O Concello celebrará dúas charlas. A primeira será o xoves, 1 de febreiro, ás 19.00 horas na Casa da Cultura Vila Concepción. A segunda terá lugar ao día seguinte, venres 2 de febreiro, ás 19.00 horas no salón de plenos. Inicialmente, estas actividades ían facerse no mes de decembro. Con todo, a solicitude das propias persoas rexistradas, o Concello cambiou as datas para estimular aínda máis a cifra de rexistrados.

As xornadas son gratuítas, pero para participar requírese inscrición previa. As persoas interesadas poderán anotarse a través do teléfono 698 177 121 ou no correo electrónico medioambiente@cambre.org.